1 Samuel 27
1ⲇⲁⲩⲉⲓⲇ ⲇⲉ ⲁϥϣⲁϫⲉ ϩⲙ ⲡⲉϥϩⲏⲧ ⲉϥϫⲱ ⲙⲙⲟⲥ ϫⲉ ⲧⲉⲛⲟⲩ ⲁⲣⲏⲩ ϩⲛ ⲟⲩϩⲟⲟⲩ ⲉⲓⲉⲉⲓ ⲉϩⲣⲁⲓ ⲉⲧⲟⲟⲧϥ ⲛⲥⲁⲟⲩⲗ ⲛⲧⲉⲧⲙⲡⲉⲧⲛⲁⲛⲟⲩϥ ϣⲱⲡⲉ ⲙⲙⲟⲓ ⲉⲓϣⲁⲛⲧⲙⲧⲱⲟⲩⲛ ⲛⲧⲁⲃⲱⲕ ⲉϩⲣⲁⲓ ⲉⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲛⲧⲉⲥⲁⲟⲩⲗ ⲥⲁϩⲱⲱϥ ⲉⲃⲟⲗ ⲙⲙⲟⲓ ⲛϥⲗⲟ ⲉϥⲕⲱⲧⲉ ⲛⲥⲱⲓ ϩⲛ ⲛⲧⲟϣ ⲧⲏⲣⲟⲩ ⲙⲡⲓ︤ⲏ︦ⲗ︥ ⲛⲧⲁⲣⲃⲟⲗ ⲉⲛⲉϥϭⲓϫ 2ⲁⲩⲱ ⲇ︤ⲁ︦ⲇ︥ ⲁϥⲧⲱⲟⲩⲛ ⲙⲛ ⲡⲉϥⲧⲟⲟⲩ ⲛϣⲉ ⲛⲣⲱⲙⲉ ⲉⲧⲛⲙⲙⲁϥ ⲁϥⲃⲱⲕ ⲉⲣⲁⲧϥ ⲛⲁⲅⲭⲟⲩⲥ ⲡϣⲏⲣⲉ ⲛⲁⲙⲙⲁⲭ ⲡⲣⲣⲟ ⲛⲅⲉⲑ 3ⲁϥⲟⲩⲱϩ ϩⲁⲧⲛ ⲁⲅⲭⲟⲩⲥ ϩⲛ ⲅⲉⲑ ⲛⲧⲟϥ ⲙⲛ ⲛⲉϥⲣⲱⲙⲉ ⲡⲟⲩⲁ ⲡⲟⲩⲁ ⲙⲛ ⲡⲉϥⲏⲓ ⲇⲁⲩⲉⲓⲇ ⲙⲛ ⲧⲉϥⲥϩⲓⲙⲉ ⲥⲛⲧⲉ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲑⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ 4ⲁⲩϫⲓ ⲙⲡⲟⲩⲱ ⲇⲉ ⲛⲥⲁⲟⲩⲗ ϫⲉ ⲁⲇⲁⲩⲉⲓⲇ ⲡⲱⲧ ⲉϩⲣⲁⲓ ⲉⲅⲉⲑ ⲙⲡⲉϥⲟⲩⲱϩ ϭⲉ ⲉⲧⲟⲟⲧϥ ⲉⲃⲱⲕ ⲉϯⲟⲩⲟⲓ ⲛⲥⲱϥ 5ⲡⲉϫⲉⲇⲁⲩⲉⲓⲇ ⲇⲉ ⲉϩⲟⲩⲛ ϩⲛ ⲁⲅⲭⲟⲩⲥ ϫⲉ ⲉϣⲱⲡⲉ ⲁⲛⲟⲕ ⲡⲉⲕϩⲙϩⲁⲗ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲙⲁⲣⲟⲩϯⲟⲩⲙⲁ ⲛⲟⲩⲱϩ ⲛⲁⲓ ϩⲛ ⲛⲉⲡⲟⲗⲓⲥ ⲉⲧϩⲏⲛ ⲉⲧⲥⲱϣⲉ ϫⲉ ⲉⲓⲉϭⲱ ⲙⲙⲁⲩ ⲛⲧⲉⲡⲉⲕϩⲙϩⲁⲗ ⲗⲟ ϩⲛ ⲟⲩⲡⲟⲗⲓⲥ ⲉⲕⲟ ⲛⲣⲣⲟ ⲛϩⲏⲧⲥ 6ⲁⲩⲱ ⲁϥϯ ⲛⲁϥ ⲙⲡⲉϩⲟⲟⲩ ⲉⲧⲙⲙⲁⲩ ⲛⲥⲉⲕⲉⲗⲁⲕ ⲉⲧⲃⲉ ⲡⲁⲓ ⲁⲥⲉⲕⲉⲗⲁⲕ ⲱⲡ ⲉⲡⲣⲣⲟ ⲛϯⲓⲟⲩⲇⲁⲓⲁ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ 7ⲁⲩⲱ ⲧⲏⲡⲉ ⲛⲛⲉϩⲟⲟⲩ ⲛⲧⲁⲇ︤ⲁ︦ⲇ︥ ⲁⲁⲩ ϩⲛ ⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ ⲁϥⲣϥⲧⲟⲟⲩ ⲛⲉⲃⲟⲧ 8ⲁⲩⲱ ⲇ︤ⲁ︦ⲇ︥ ⲉⲛⲉϣⲁϥⲃⲱⲕ ⲉϩⲣⲁⲓ ⲙⲛ ⲛⲉϥⲣⲱⲙⲉ ⲛⲥⲉϯ ⲙⲛ ⲡⲅⲉⲥⲓⲣⲓ ⲧⲏⲣϥ ⲙⲛ ⲡⲁⲙⲁⲗⲏⲕ ⲁⲩⲱ ⲉⲓⲥ ⲡⲕⲁϩ ⲛⲉϥϭⲟⲣϭ ϫⲓⲛ ⲅⲉⲗⲁⲙⲯⲟⲩⲣ ⲉⲧⲉⲙⲙⲁ ⲛⲉ ⲉⲧⲏⲡ ⲉⲣⲟⲟⲩ ⲉⲩⲟⲣϫ ϣⲁ ⲉϩⲣⲁⲓ ⲉⲕⲏⲙⲉ 9ⲁⲩⲱ ⲛⲉϥⲑⲙⲕⲟ ⲙⲡⲕⲁϩ ⲉⲛϥⲛⲟⲩϩⲙ ⲛⲟⲩϩⲟⲟⲩⲧ ⲁⲛ ⲟⲩⲇⲉ ⲟⲩⲥϩⲓⲙⲉ ⲁⲩⲱ ⲛⲉϥϫⲓ ⲛϩⲉⲛⲟϩⲉ ⲛⲉⲥⲟⲟⲩ ⲙⲛ ϩⲉⲛⲁϩⲟⲟⲩ ⲁⲩⲱ ϩⲉⲛⲉⲥⲟⲟⲩ ⲙⲛ ϩⲉⲛϭⲁⲙⲟⲩⲗ ⲁⲩⲱ ϩⲉⲛϩⲟⲉⲓⲧⲉ ⲁⲩⲱ ⲛⲉⲩⲕⲧⲟ ⲙⲙⲟⲟⲩ ⲉⲩⲛⲏⲩ ⲉⲣⲁⲧϥ ⲛⲁⲅⲭⲟⲩⲥ 10ⲡⲉϫⲉⲁⲅⲭⲟⲩⲥ ⲉϩⲟⲩⲛ ϩⲛ ⲇ︤ⲁ︦ⲇ︥ ⲉϥϫⲱ ⲙⲙⲟⲥ ⲛⲁϥ ϫⲉ ⲛⲧⲁⲧⲉⲧⲛⲃⲱⲕ ⲉⲣⲉⲛ ⲛⲓⲙ ⲙⲡⲟⲟⲩ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲛⲧⲁⲛⲃⲱⲕ ⲉⲣⲉⲛ ⲡⲥⲁ ⲙⲡⲣⲏⲥ ⲛϯⲟⲩⲇⲁⲓⲁ ⲁⲩⲱ ⲉⲣⲉⲙ ⲡⲥⲁ ⲙⲡⲣⲏⲥ ⲛⲓⲉⲥⲙⲉⲅⲁ ⲁⲩⲱ ⲉⲣⲉⲙ ⲡⲥⲁ ⲙⲡⲣⲏⲥ ⲙⲡⲕⲉⲛⲉⲍⲓ 11ⲁⲩⲱ ϩⲟⲟⲩⲧ ⲛⲓⲙ ⲙⲛ ⲥϩⲓⲙⲉ ⲛⲓⲙ ⲙⲡⲉⲛϩⲁⲣⲉϩ ⲉⲣⲟⲟⲩ ⲉⲉⲛⲧⲟⲩ ⲉϩⲟⲩⲛ ⲉⲅⲉⲑ ⲉⲓϫⲱ ⲙⲙⲟⲥ ϫⲉⲕⲁⲥ ⲛⲛⲉⲩϫⲉⲟⲩϣⲁϫⲉ ⲉⲧⲃⲏⲏⲧ ϩⲛ ⲅⲉⲑ ⲉⲩϫⲱ ⲙⲙⲟⲥ ϫⲉ ⲛⲁⲓ ⲛⲉ ϣⲁⲣⲉⲇ︤ⲁ︦ⲇ︥ ⲁⲁⲩ ⲁⲩⲱ ⲡⲁⲓ ⲡⲉ ⲡⲉϥⲇⲓⲕⲁⲓⲱⲙⲁ ⲛⲛⲉϩⲟⲟⲩ ⲧⲏⲣⲟⲩ ⲛⲧⲁⲇ︤ⲁ︦ⲇ︥ ⲁⲁⲩ ϩⲛ ⲧⲥⲱϣⲉ ⲛⲛⲁⲗⲗⲟⲫⲩⲗⲟⲥ 12ⲁⲩⲱ ⲁⲅⲭⲟⲩⲥ ⲁⲡⲉϥϩⲏⲧ ⲧⲱⲧ ⲉⲙⲁⲧⲉ ⲉϫⲛ ⲇⲁⲩⲉⲓⲇ ⲉϥϫⲱ ⲙⲙⲟⲥ ϫⲉ ϩⲛ ⲟⲩϣⲓⲡⲉ ⲁϥϫⲓ ϣⲓⲡⲉ ϩⲙ ⲡⲉϥⲗⲁⲟⲥ ⲡⲓ︤ⲏ︦ⲗ︥ ⲁⲩⲱ ϥⲛⲁϣⲱⲡⲉ ⲛⲁⲓ ⲛⲟⲩϩⲙϩⲁⲗ ⲛϣⲁ ⲉⲛⲉϩ
Copyright information for
CopSahBible2